З’яўляючыся класным кіраўніком 9 класа, добра ўсведамляю сабе, што хутка для маіх вучняў надыйдзе час выбару дарогі, па якой ісці далей, - дарогі ў прафесію.

Пошук прафесійнага шляху падлеткам – справа складаная і важная. Каб не дапусціць памылак, трэба параіцца з бацькамі, сябрамі, знаёмымі. Але іх парады, як правіла, адлютроўваюць іх пажаданні і патрэбы. А рабіць вывад для сябе прыйдзецца самім. Правільнасць гэтага вываду будзе залежыць ад таго, наколькі выпускнік базавай школы ведае і разбіраецца ў сваіх магчымасцях і валодае інфармацыяй аб спосабах іх рэалізацыі. Гэта значыць, што дзяўчына ці хлопец павінны зразумець, што ў сучасных умовах важна стаць прафесіяналам, каб быць стабільна забяспечаным работай. Але што выбраць для сябе? Прафесій, спецыяльнасцей шмат, і тых, традыцыйных, і новых, сучасных, якія не былі вядомыя пакаленню бацькоў. Кожная з іх прад’яўляе да чалавека свае парабаванні, вымагае валодання пэўнымі якасцямі і навыкамі.

Таму разабрацца з гэтымі пытаннямі вучням дапамагалі спецыялісты цэнтра занятасці насельніцтва, прадстаўнікі ліцэя, а найперш бацькі, якія расказвалі маім вучням  і аб рабоце інспектара па ахове прыроды, і аператара аддзялення сувязі. Апошняя такая сустрэча адбылася ў кастрычніку.

Госцем у класе была адна з нашых мам Шарабайка Таццяна Юр’еўна. У свой час атрымаўшы па падказцы бацькоў прафесію эканаміста, знайшла сябе ў ёй. Працавала эканамістам у жывёлаводчай галіне гаспадаркі ААТ “Канстацінаў Двор”, зараз працуе ў тэрытарыяльным цэнтры сацыяльнага абслугоўвання насельніцтва “Крыніца”.

Аналіз эканамічных працэсаў і з’яў у той сферы народнай гаспадаркі, дзе працуеш, прапановы па рацыянальнаму выкарыстанню грашовых сродкаў, прагноз развіцця галіны – вось асноўныя функцыі эканаміста. Тут неабходныя і матэматычная падрыхтоўка, і валоданне камп’ютарам, і уменне кантактаваць з людзьмі.

Спадзяюся, што мае дзевяцікласнікі сталі больш усведамляць сабе, што значыць быць эканамістам, каб не ганяцца разам з іншымі за адной з самых рэйтынгавых спецыяльнасцей. А яшчэ – што і іншыя прафесіі – будаўніка, інжынера, механізатара, доктара і настаўніка, вельмі запатрабаваныя ў грамадстве.

Асон Л.П., класны кіраўнік 9 класа