“Вітаем вас!” Пад такой назвай у мінулую суботу ў нашай школе адбылася цікавая сустрэча. З сяброўскім візітам да нас завітала ў госці пад кіраўніцтвам ксяндза Паўла Самсонава і сястры Марыяны Гроць група школьнікаў з парафій в. Дунілавічы і г.п. Варапаева.

            Госці прыехалі да нас не з пустымі рукамі. У якасці падарунка мы атрымалі цікавыя цацкі і развіваючыя гульні для дзіцячага сада, а таксама – магчымасць паслухаць у выкананні нашых равеснікаў святочную канцэртна – забаўляльную праграму “Дарога да Храма”. Пад прыгожыя акорды гітары, якой акампанаваў не зусім звыклы для нас афрыканскі там – там, прагучалі песні рэлігійнага зместу, творы пра прыгажосць адносін Бога і чалавека, патрыятычныя песні. Асабліва нас уразіла выкананне песні “Малюся за цябе, Беларусь”, калі і гледачы, і выканаўцы ў адзіным парыве спявалі разам.

            Маленькая інсцэніроўка, у якой артысты паказалі малюнкі з жыцця, заставіла нас задумацца над адносінамі да тых, хто побач з намі, хто патрабуе нашай дапамогі і падтрымкі.

            А найбольш вясёлымі аказаліся інтэграцыйныя танцы, гэта значыць – танцы для ўсіх, калі ніхто не сумуе і не хаваецца з – за сораму, што, можа, нешта не атрымаецца. У такіх танцах ва ўсіх усё атрымоўваецца вельмі добра, таму яны нам і падабаюцца.

            Мы ж, як гаспадары, у сваю чаргу падрыхтавалі для гасцей экскурсію па школе, расказалі гісторыю нашай установы адукацыі, паказалі класы і кабінеты. А закончылася сустрэча з сябрамі за “салодкім” сталом з гарбатай і рознымі прысмакамі.

            Спадзяюся, што наша сяброўства будзе працягвацца.

                                                                      Папова Аляксандра, вучаніца 7 класа