Экскурсія па месцах партызанскай славы

         29 мая вучні пачатковых класаў  на чале з кіраўніком патрыятычнага выхавання Аляхновічам Аляксандрам Станіслававічам наведалі ўстанову культуры ”Ушацкі музей народнай славы імя Героя Савецкага Саюза Уладзіміра Елісеевіча Лабанка“ і мемарыяльны комплекс ”Прарыў“. Хлопчыкі і дзяўчынкі з цікавасцю слухалі расповяд экскурсавода пра самыя трагічныя старонкі гісторыі Ушаччыны і ўсёй Беларусі, пра подзвіг партызан у гады вялікай Айчыннай вайны.

         З Аляксандрам Станіслававічам і настаўнікамі Ванёнак Валянцінай Антонаўнай і Фёдаравай Ганнай Станіславаўнай вучні наведалі ”зялёную“ школу, дзе вучыліся дзеці, партызанскія зямлянкі, пазнаёміліся з побытам  партызан, убачылі ўзоры ваеннай тэхнікі  і артылерыйскіх гармат. Але больш за ўсё вучняў уразіла бронзавая фігура партызана, які прарываецца скрозь бетонную сцяну - просты і зразумелы сімвалізм для помніка, які ўвасабляе мужнасць і стойкасць партызан.

         ”Ніхто не забыты і нішто не забыта!“ – сімвалічныя словы, зразумелыя нават маленькім… Пра подзвіг народа ў гады ваеннага ліхалецця трэба ведаць і памятаць, каб больш наша шматпакутная зямля ніколі не спазнала гора і слёз.