У нас адбылося не зусім звычайнае мерапрыемства. Рэліквіі сваёй сям’і прадэманстравала настаўніца беларускай мовы і літаратуры Кабылінская Іна Аляксееўна.

Уявіце сабе! Зіма. Звычайная хата, якіх шмат у нашых вёсках. Заўжды ў хаце цёпла, чыста прыбрана, пахне смачнымі пірагамі. І ўсё нейкае асаблівае, незвычайнае. А колькі ў хаце вышыванак, мудрагелістых вязаных сурвэтак, тканых дываноў і пасцілак.

Мы у гасцях у Катовіч Аграфены Пятроўны. Зараз бабулі Груні 88 гадоў. І на зіму яна пераехала да дачкі Іны Аляксееўны. А як толькі сонца звернецца ў вясну – зноў вярнецца ў сваю хату. Зноў спрацаваныя рукі будуць прыбіраць каляровыя ніткі, складаючы іх у прыгожыя ўзоры. Зноў будуць даглядаць кветкі, якіх так многа ў панадворку. І з радасцю абдымаць дачку з зяцем і ўнучак Злату і Лілю з мужам Вадзімам, якія шчыра любяць сваю маму і бабулю, клапоцяцца пра яе, атуляючы любоўю, павагай і пяшчотай.