Хутка закружаць карагодамі  навагоднія елкі. Але ці весела ім самім на свяце?

Адказ на гэта пытанне знайшлі вучні пачатковых класаў у ходзе экспедыцыі ў пастаянны базісны лясны пітомнік Глыбоцкага вопытнага лясгаса, якая была праведзена ў рамках акцыі “Уратуем зялёную прыгажуню”. У пітомніку гасцей ветліва сустрэў Яўгеній Уладзіміравіч Тарасенка.

З цікавасцю і здзіўленнем дзеці слухалі гісторыю ялінак, якія, са слоў Яўгенія Уладзіміравіча, спачатку “бавяць час у яслях ды садку”, потым “ідуць у школу”, а затым “трапляюць у дарослае жыццё – лес”. А яшчэ дзеці даследавалі, што за год елачка вырастае “з пальчык”, за два гады – “ з два пальчыкі”, а вялікая елка расце 100 гадоў. Даведаліся, што елачкі можна сеяць круглы год, нават па снезе, і што іх трэба палоць, карміць, паіць. А яшчэ ім, як і людзям, патрэбны чуласць і пяшчота.

Колькі працы і часу! А потым навагоднія святы, сухія елачкі на сметніках…

Яшчэ раз дзеці ўпэўніліся, што неабходна ратаваць прыгажунь, і шпарчэй сталі майстраваць ялінкі сваімі рукамі з дапамогай настаўнікаў і бацькоў.

Жывіце, елачкі! Да сустрэчы вясной!

                                            Настаўнік пачатковых класаў   Фёдарава Г.С.