Адгаманілі  карагодамі  навагоднія елкі, закончыліся зімовыя канікулы. Дзеці, бадзёрыя  і вясёлыя, зноў селі за школьныя парты.  Наперабой расказваюць яны пра  падарункі Дзеда Мароза, навагоднія вандроўкі да бабуль і дзядуль, родных і блізкіх. Багата ўражанняў прывезлі вучні  пасля экскурсіі ў  Глыбоцкі гісторыка-этнаграфічны музей і Цэнтр дзяцей і моладзі, што адбылася 4 студзеня.

Шмат цікавага з гісторыі грошай і навагодніх цацак  даведаліся вучні школы ў ходзе наведвання выстаў  музея  “Папяровая каштоўнасць” і “Цуды елачнай цацкі”, дзе  першай дзяцей сустрэла і павіншавала дырэктар Саланінка Вольга Пятроўна. З захапленнем вучні слухалі расповяды навуковых супрацоўнікаў Мірончыка Уладзіміра Анатольевіча і Мядзелец Алены Мікалаеўны. Цікава было назіраць, як радаваліся дзеці, пазнаўшы цацку ці ланцужок, якія бачылі на елках у сваіх бабуль.

Змястоўную праграму падрыхтавалі для юных наведвальнікаў у Цэнтры дзяцей і моладзі. Шчыра вітала дзетак дырэктар Касцюкевіч Зоя Клаўдзіеўна. Педагог-арганізатар Анастасія Аляксандраўна Развадоўская раззадорыла ўсіх навагоднімі гульнямі, а потым запрасіла на выставу “Калядная зорка”. Пад кіраўніцтвам педагогаў дадатковай адукацыі Ірыны Уладзіміраўны Пачкоўскай і Марыі Казіміраўны Ствол хлопчыкі і дзяўчынкі шчыравалі на майстар-класах па пашыве мяккай цацкі і квілінгу.

Канікулы закончыліся, але ў дзяцей засталося шмат добрых і прыемных уражанняў. Хочацца падзякаваць усім, хто стварыў  для дзяцей святочны навагодні настрой і пажадаць  творчых поспехаў.

                                                                                        Настаўнік пачатковых класаў Фёдарава Ганна Станіславаўна