16 студзеня на калядныя сустрэчы  “Гэта цуда – Хрыста нараджэнне!”  сабраліся школьнікі, настаўнікі і мясцовыя жыхары.  Ва ўстанову адукацыі завіталі госці з Глыбокага: пратаіерэй Сергій Грамыка  і выхаванцы царкоўнай школы.

     Спачатку гледачам быў прапанаваны відэафільм пра Божае нараджэнне, у якім паведамлялася, што Ісус Хрыстос з’явіўся на свет, каб выратаваць людзей.  Ён дараваў нам сваю любоў.  Вешчуны першымі прыйшлі да яго і прынеслі дары: золата, ладан і смірну.

     Гэта азначае, што кожны з нас мае выбар ў жыцці: ступіць на дарогу дабра або зла. Гэты выбар рабіць ў жыцці вельмі складана. Зялёная ялінка, якую мы ставім ў памяшканні на свята, сімвалізуе біблейскае дрэва пазнання. І пра гэта гаварыў пратаіерэй Сергій. Але самае галоўнае, каб у нашых сэрцах жылі вера, надзея і любоў!

    Пасля цікавай гутаркі выхаванцы царкоўнай школы разам са святаром спявалі калядныя песні. Сэрцы кожнага з прысутных перапаўнялі пачуцці шчасця і радасці. Ніхто не застаўся раўнадушным. Напрыканцы дзеці абмяняліся салодкімі пачастункамі, і ўсе пажадалі адзін аднаму з любоўю і радасцю сустрэць свята Богаз’яўлення.