Шэраг мерапрыемстваў, прысвечаных Дню памяці воінаў-інтэрнацыяналістаў

     У адпаведнасці з планам ваенна-патрыятычнага выхавання навучэнцаў у ДУА ”Карабаўская сярэдняя школа імя Р. І. Мацеюна“ на люты месяц запланаваны шэраг мерапрыемстваў, прысвечаных Дню памяці воінаў-інтэрнацыяналістаў.

     У рамках рэспубліканскай дэкады грамадзянска-патрыятычных спраў і школьнага музейнага праекта ”Афганістан у лёсе нашых землякоў“ адбылася цікавая сустрэча з земляком, былым выпускніком Карабоўскай васьмігадовай школы, воінам-інтэрнацыяналістам Блышко Віктарам Іосіфавічам.

     Віктар Іосіфавіч нарадзіўся ў вёсцы Лаўцы ў сялянскай сям’і. У1975 годзе скончыў Карабоўскую васьмігодку, затым Глыбоцкае СПТУ-168. Пасля вучобы быў прызваны на тэрміновую службу, якую праходзіў у Венгрыі, потым вучыўся ў Чарняхоўскім ваенным вучылішчы на ваеннага лётчыка. З 1988 года прызваны на службу ў горад Бадран Рэспублікі Афганістан, знаходзіўся там да вываду савецкіх войскаў.

       Воін-інтэрнацыяналіст успамінаў, як у ваенных умовах служыў на самалёце СУ-25. Кожны баявы палёт працягваўся не менш трох гадзін. Шмат самалётаў збівалі варожыя ракеты, пакуль не навучыліся ”лётаць па спіралі“.

     А крыху пазней у Карабах ветліва прымалі вучняў Шунеўскай базавай школы. Гасцей цёпла віталі педагогі і вучні. Кіраўнік па ваенна-патрыятычным выхаванні, старшыня раённай арганізацыі ГА ”Саюз афіцэраў Рэспублікі Беларусь“ Аляксандр Станіслававіч Аляхновіч пазнаёміў хлопчыкаў і дзяўчынак з гісторыяй установы адукацыі, расказаў пра першага яго дырэктара, удзельніка Вялікай Айчыннай вайны Івана Сцяпанавіча Ляхава і пра выпускніка школы, воіна-інтэрнацыяна Іосіфавіча Мацеюна.

     Гасцям таксама быў прапанаваны відэафільм, які апавядае аб подзвігу пяці ўраджэнцаў Глыбоччыны, якія загінулі, выконваючы свой інтэрнацыянальны абавязак у Афганістане. А затым юныя экскурсаводы Карабоўскай СШ правялі для сваіх аднагодкаў з Шунеўцаў экскурсію ў музейным кутку, прысвечаным воінам-інтэрнацыяналістам.

     Навучэнцы нашай установы разам з кіраўніком па ваенна-патрыятычным выхаванні Аляхновічам Аляксандрам Станіслававічам удзельнічалі ў мітынгу, прысвечанаму Дню памяці воінаў-інтэрнацыяналістаў у г.Глыбокае.