13 красавіка ва ўстанове адукацыі адбыліся чарговыя заняткі лекторыя псіхолага-педагагічных ведаў для бацькоў “Дзеці: закон і адказнасць”. У гэты раз перад слухачамі выступілі пракурор Глыбоцкага раёна Валынец Ігар Сямёнавіч, старшы дзяржаўны інспектар АДАІ Глыбоцкага РАУС Заяц Юрый Уладзіміравіч і начальнік раённага аддзела па надзвычайных сітуацыях Завадскі Васілій Уладзіміравіч.

У сваіх выступленнях яны адзначылі, што толькі кантроль з боку бацькоў за правядзеннем вольнага часу дзецьмі і падлеткамі зможа аберагчы іх ад  непрыемнасцей. Так, Ігар Сямёнавіч асабліва падкрэсліў, што ўседазволенасць і безадказнасць павышаюць рызыку дрэнных кантактаў і сувязей у падлеткавым асяроддзі, а гэта  ў большасці выпадкаў прыводзіць да правапарушэнняў.

Інспектар ДАІ Юрый Уладзіміравіч звярнуў увагу прысутных, што зусім хутка – летнія канікулы, якія, на жаль, з’яўляюцца сезонам ДТЗ з удзелам непаўналетніх. У сувязі з гэтым ён нагадаў бацькам веласіпедыстаў і вадзіцеляў мапедаў аб неабходнасці выканання правіл дарожнага руху, настойліва рэкамендаваў уладальнікам усіх двухколавых транспартных сродкаў, перш чым выехаць на дарогу, пераканацца ў іх спраўным стане, паведаміў, што ў Беларусі 29 красавіка пройдзе Адзіны дзень бяспекі дарожнага руху пад дэвізам “У новы мотавела сезон – без аварый!”, які будзе накіраваны на прафілактыку ДТЗ з удзелам двухколавага транспарту.

Аб супрацьпажарнай бяспецы, аб забароне выпальвання сухой травы, аб захаванні правіл бяспечных паводзін у час летніх канікулаў гаварыў Васілій Уладзіміравіч Завадскі. Ён прывёў прыклады трагічных выпадкаў з удзелам дзяцей і прадаставіў відэаролік “Цана імгнення”, падрыхтаваны Міністэрствам па надзвычайных сітуацыях.

Усе выступоўцы выказалі думку, што кантроль вольнага часу дзяцей і падлеткаў з’яўляецца прафілактыкай супрацьпраўных паводзін і ўчынкаў. Бацькі павінны ведаць, што дзіця робіць, дзе знаходзіцца, чым займаецца. Толькі так можна пазбегнуць многіх правапарушэнняў і трагедый.

Асобным пунктам бацькоўскага сходу было разгледжана пытанне аб заканчэнні навучальнага года выпускнікамі 9 і 11 класаў. Законныя прадстаўнікі былі азнаёмлены з Правіламі правядзення атэстацыі навучэнцаў пры засваенні зместу адукацыйных праграм агульнай сярэдняй адукацыі, з інструктыўна-метадычным пісьмом “Аб завяршэнні 2015/2016 навучальнага года і правядзенні выпускных экзаменаў ва ўстановах агульнай сярэдняй адукацыі”.