Наступілі халады, а за імі заспяшаўся мароз, засыпаў снег, завыў вецер. Холадна і голадна стала птушкам. Як і заўсёды, на дапамогу крылатым сябрам паспяшаліся  вучні нашай школы.

Асабліва шчыравалі пачаткоўцы і вучні 5 класа. Кармушкі ўдаліся на славу. А інакш і быць не магло, бо да працы далучыліся таты і мамы, бабулі і дзядулі. Кармушкі радавалі не толькі дызайнам, але і памерам. Хто ўцяпліў іх прыгожымі вязанымі ўзорамі, хто намаляваў сонейка. Квач Яўгеній Іосіфавіч, тата дачушкі-першакласніцы, змайстраваў не проста кармушку, а сапраўдную птушыную сталовую, дзе птушкам добра і ўтульна не толькі пакарміцца, але і адпачыць, схавацца ад сцюжы. Дарэчы, сёлета ўсе таты вучняў першага класа далучыліся да акцыі і змайстравалі з дзецьмі кармушкі.

         Завіхаліся бацькі, завіхаліся і дзеці. Як прыемна, што дарослыя не засталіся ў баку ад школьных спраў, а сваім прыкладам прадэманстравалі важнасць супольнай працы. Дзякуй Вам, паважаныя бацькі. Спадзяёмся, што ўсе добрыя пачынанні дзяцей атрымаюць Вашу шчырую падтрымку.