Вучні пачатковай школы – непаседлівы і цікаўны народ. Ім не страшныя ні холад, ні дождж, толькі падавай прыгоды ды падарожжы. І так у любую пару года. А што ўжо гаварыць пра зімовыя канркулы! Таму загадзя было вырашана: едзем шукаць прыгоды ў Глыбокае! І не памыліліся.

         Спачатку мы завіталі ў Цэнтр дзяцей і моладзі, дзе нас гасцінна сустрэлі і прапанавалі карагоды, танцы, песні і гульні. Пасля вучні мелі магчымасць наведаць калядную выставу і пазнаёміцца з творчасцю вучняў раёна.

         Наступным прыпынкам стаў Дом рамёстваў,  дзе нас чакала сапраўдная калядная феерыя. Дзеці наведалі выставы работ з саломкі, бісеру, воўны, даведаліся, што такое кросны і як ткалі дываны ды палатно. Але самая цікавая сустрэча – гэта майстар клас па вырабу кубка з гліны. Дзеці з зачараваннем назіралі, як нараджаўся кубак і як лоўка ганчарных спраў майстар зняў яго з ганчарнага кола.

         Нарэшце, мы апынуліся ў “царстве” папугаяў. Самы вялікі і разумны папугай Кеша, які ўжо колькі дзён запар “гасцяваў” з іншымі птушкамі ў Глыбоцкім этнаграфічным музеі, пракрычаў: “Прывітанне!” – і гасцінна дазволіў дзецям любавацца сабой і суродзічамі. Колькі радасці было! Першакласнікі нават успомнілі, што яны ўжо чулі на ўроку рускай мовы смешную і павучальную гісторыю пра папугая Рокі, які ўмеў размаўляць і гасцінна прапаноўваў гасцям гарбату. У музеі таксама “гасцяваў” папугай Рокі.

Дзеці з захапленнем дапамагалі паказваць цыркавыя трукі какаду, даведаліся шмат цікавага з жыцця папугаяў. Аднак многім хацелася выпусціць птушак на волю, а некаторым – займець крылатых сяброў.

         Дадому вярталіся стомленыя, але шчаслівыя. Цуды на Каляды працягваюцца!