“ Хто валодае чарамі песень, душой завалодае  любой..."  І гэта  пацвердзіў другі школьны фестываль   беларускай    песні  “Зорка Венера”, які адбыўся ў нашай  школе   11  сакавіка.

       Падрыхтоўка да фестывалю  пачалася даўно. І вось гэты   момант настаў. Журы   чакала вялікая  і клапатлівая  праца. Дзевяць нумароў  самадзейнасці  не падобных  адзін на аднаго. Кожны артыст -  гэта  індывідуальнасць і скарбонка таленту.

    Сваёй смеласцю і талентам  заваявалі слухачоў  вакалісты: Федзічкіна Юльяна ( 1 клас), Спаднікайла Антон  ( 6 клас), Барыла Паліна ( 9 клас), Батура Сяргей ( 11 клас). Песні гучалі звонка, пранікнёна, задушэўна. Сучасная манера выканання  беларускай песні пад  гітару  “ Простыя  словы” Батура Сяргеем уразіла слухачоў. Меладычнасць, задушэўнасць краналі душу.

      Вакальныя групы  2, 5, 9, 10 і 11 класаў  парадавалі сваёй бадзёрасцю і ўзнёсласцю. Як і спакон   вякоў, нацыянальныя песні суправаджаліся танцамі. Ну як жа не станцаваць пад  “Польку беларускую”   ці заўзятую  “Бульбу”! 

  Многа шчаслівых і радасных мінут   атрымалі гледачы ад беларускіх песень. Не заўважылі, як праляцеў час і наступілі доўгія мінуты чакання вынікаў фестывалю.  Лаўрэатамі  сталі вакальная група 2 класа з песняй “Мы жывём у Беларусі “ сярод вучняў пачатковых класаў;  Спаднікайла Антон, вучань 6 класа, з песняй  “Свята дзяцінства”    сярод  вучняў  5 – 7 класаў. Сярод вучняў 8 – 11 класаў лаўрэаты  вызначыліся па дзвюх намінацыях: вакальныя групы –  група 9 класа з песняй “Бульба “ ; сольнае выступленне – Батура Сяргей, вучань 11  класа, з песняй “ Простыя словы”.  Прыз гледачоў адзінагалосна прысудзілі вакальнай групе 9 класа.

       Фестываль беларускай песні яшчэ раз  пацвердзіў выказванне

А. Крывіцкага: “ Незвычайнае хараство і зладжанасць чуецца нам у гучанні роднага слова.”

                                                                          Барыла Інга, вучаніца 10 класа