Сюды! Сюды!

Прадстаўленне пачынаецца,

Усе - усе

На кірмаш запрашаюцца!

    Менавіта такімі словамі пачаўся “Карабоўскі кірмаш”, які доўга чакалі пачаткоўцы. Гэтаму мерапрыемству садзейнічала вялікая падрыхтоўчая работа, так як хлопчыкі і дзяўчынкі павінны былі зарабіць грошы (“корабы”), каб набыць сабе на кірмашы духмяную гарбату і прысмакі. А як жа зарабіць “корабы”? Магчымасцей было шмат: намаляваць малюнак на тэму “Важкі кош”, зрабіць падзелку з восеньскіх дароў, прыняць удзел у падрыхтоўцы касцюмаў. Нават у групе падоўжанага дня вучні, пад кіраўніцтвам Кухта Дзіяны Леанідаўны, зрабілі незвычайныя дыванкі з восеньскіх лістоў.

    І вось свята пачалося. На кірмаш завітала сама Восень з памошніцамі –Карабалінкай і Вераснянкай. Яны прынеслі шмат цікавых заданняў. Вучні адгадвалі загадкі, з задавальненнем гулялі ў гульні “Збяры бульбу”, “Трывалы лоб”, “Вясёлая бульбінка”. Самыя маленькія ўдзельнікі не толькі танчылі, але і праспявалі песню “Бульба”. На свяце не абышлося без успаміну народных традыцый: усім спадабаўся танец з ручнікамі ў выкананні дзяўчынак 3-4 класаў.

    Немагчыма было адарваць вачэй ад выставы дзіцячых работ на тэму “Багаты ўраджай”. Колькі фантазіі і вынаходніцтва праявілі юныя творцы.

    Акрамя таго, на кірмашы працавалі “духмяная” і “вітамінная” лаўкі. Усе прысутныя мелі магчымасць пакаштаваць гарбату з мяты, мялісы, чабору. душыцы, рамонку, шыпшыны. А навіной сталі новыя гатункі ягаднай гарбаты з лістоў чорнай парэчкі і вішні, а таксама з лістоў антонаўкі.

    Кірмаш гудзеў, граў гармонік, “корабы” ляцелі ў лаўкі з прысмакамі, настрой панаваў узнёслы, уражанні перапаўнялі.

    Такім чынам, праект “Водар Карабоўшчыны” працягвае сваю дзейнасць і абяцае быць цікавым.