Снег зацерушыў наваколле, вучні школы ў чаканні навагодніх святаў… 2019 год адметны яшчэ і тым, што

1 студзеня – гэта не толькі першы дзень новага года, але і дзень стогадовага юбілею ўтварэння Беларускай Савецкай Сацыялістычнай Рэспублікі.

У Дзяржаўнай установе адукацыі “Карабоўская дзіцячы сад-сярэдняя школа Глыбоцкага раёна імя Р.І. Мацеюна” на належным узроўні наладзілі і правялі мерапрыемствы ў гонар свята.

Па-асабліваму рыхтаваліся самыя малодшыя – вучні 1 і 2 класаў. Разам з настаўнікамі яны сталі ўдзельнікамі захапляльнага падарожжа па родным краі. Мерапрыемства прайшло ў форме вуснага часопіса “Беларусь – мая Радзіма!”.

Гартаючы старонкі часопіса, маленькія чытачы і грамадзяне ўзбагацілі свае веды па тэмах “Сімвалы Беларусі”, “Гарады Беларусі ў легендах і паданнях”, “Беларусь – край лясоў і азёр”, “Беларусь – краіна майстроў”.

Малодшыя школьнікі непаседлівыя і няўрымслівыя, творчыя і крэатыўныя, таму часопіс багаты на тэматычныя гульні, крыжаванкі, загадкі і рэбусы, прэзентацыі. Даволі сур’ёзны гістарычны матэрыял успрыняўся дзецьмі, як цікавы расповед пра сімволіку, мінуўшчыну і сучаснасць Беларусі, таленавітых майстроў-умельцаў, вядомых і знакамітых продкаў. Сапраўдным адкрыццём для дзяцей было тое, што Рэспубліка Беларусь разам з чатырнаццаццю іншымі рэспублікамі ўваходзіла ў склад Саюза Савецкіх Сацыялістычных Рэспублік – вялікай і магутнай дзяржавы, якую ведалі і з якой лічыліся ва ўсім свеце.

А яшчэ – беларускае, роднае, непаўторнае, часам не спазнанае дзецьмі беларускае слова! Слова як невычэрпная крыніца ведаў!..

Дзеці былі чытальнікамі, суразмоўцамі, спевакамі, удзельнікамі гульняў. Самае галоўнае – пачаткоўцы прыйшлі да высновы, што сапраўдны грамадзянін, хаця і маленькі, павінен вучыцца спазнаваць і любіць Радзіму, памятаць, што “няма смачнейшае вадзіцы, як з роднае крыніцы”.

…І што нам горы, да нашто нам моры!

У родным краі стрэцім мы вясну!

І зажывем, абуджаныя сонцам,

І заспяваем. Як вясёла жыць!

Свой край вясновы любім мы бясконца,

Чакаем: мо жураўка закрычыць?!

                                               Г. Фёдарава