18 студзеня маленькія майстры 1-2 класаў упершыню наведалі Дом рамёстваў. А адбылося гэта з нагоды старту праекта, прысвечанага Году малой радзімы “Народныя ўмельцы Карабоўшчыны”.

         У Доме рамёстваў дзяцей шчыра прывітала дырэктар Святлана Анатольеўна Скавырка і перад пачаткам заняткаў запрасіла наведаць выставу Таццяны Анатольеўны Фаміной “Набываючы майстэрства”, якая прэзентавалася ва ўстанове. Дзеці з задавальненнем слухалі расповяд аўтара і дзівіліся, якія цудоўныя беларускія лялькі і іншыя вырабы стварыла майстар. Безумоўна, выстава ўсім спадабалася. Сімвалічна, што яна стала пачаткам вандроўкі ў дзівосны свет народных рамёстваў.

         Распачалася гэтая вандроўка ў класах-майстэрнях гліняных вырабаў і вырабу паясоў. Майстар ганчарнай справы Арцём Мікалаевіч Фамін і майстар па вырабу паясоў Алена Сяргееўна Дабравольская запрасілі вучняў на заняткі, і дзеці ўпершыню далучыліся да народнага рамяства.

         Трэба было бачыць, з якім захапленнем і стараннасцю пачаткоўцы стваралі свае першыя вырабы! Не па ўзросту сур’ёзныя, маленькія ганчары ляпілі з гліны снегавікоў. А ўсё дзякуючы таму, што Арцём Мікалаевіч вельмі цікава і проста дзяліўся сакрэтамі ганчарнай справы. Снегавікі ўдаліся адмысловыя!

         Не менш клопатаў і ўражанняў было і ў майстэрні па вырабу паясоў. Спачатку Алена Сяргееўна даступна расказала пачаткоўцам пра гісторыю паясоў, а потым пад яе кіраўніцтвам закіпела праца. Паясы з нітачак, вядома, не слуцкія, але ж сплеценыя дзецьмі самастойна. У хуткім часе з легкай рукі Алены Сяргееўны яны ператварыліся ў чароўныя шнурочкі жаданняў, спаўнення якіх з нецярплівасцю чакаюць дзеці і настаўнікі.

         Занятак закончыўся, аднак маленькіх майстроў чакаў яшчэ адзін сюрпрыз. У свой клас нас запрасіў майстар па дрэву Віктар Баляслававіч Дудкевіч. Трэба было бачыць, з якім бляскам у вачах дзеці трымалі ў руках дынамічныя драўляныя цацкі, зробленыя рукамі майстра і яго вучняў, прымяралі калядныя маскі, як дзівіліся яны з батлейкі! Станоўчыя эмоцыі перапаўнялі і вучняў, і настаўнікаў.

         Мы развітваліся з гасціннымі гаспадарамі і майстрамі Дома рамёстваў з намерам зноў прыехаць, каб павучыцца майстэрству ткацтва, выцінанкі, пляцення з саломкі, вырабу драўлянай цацкі. А як жа не прадоўжыць знаёмства, калі так цёпла адгукнуліся на нашу просьбу і запрасілі нас да супрацоўніцтва майстры і дырэктар Дома рамёстваў. Шчыра дзякуем за хвіліны адкрыццяў і тварчасці!

Шчаслівыя дзеці, задаволеныя іх бацькі. А вучань 2 класа Мішута Мікіта сказаў:

         ─ Давайце мы выйдзем за дзверы, а потым зойдзем. Як быццам мы зноў прыехалі!