Мы часта лічым, што таленавітыя людзі жывуць усюды, толькі не побач з намі. Дзякуючы праекту “Народныя ўмельцы Карабоўшчыны”, упэўніліся, што гэта зусім не так.

         Карабоўшчына – край надзвычай таленавітых майстроў. Адзін з іх завітаў да вучняў 1-2 класаў Карабоўскай дзіцячага сада-сярэдняй школы Глыбоцкага раёна імя Р.І. Мацеюна” і стаў удзельнікам гасцёўні “Лазовы цуд”.

         Усе жыхары Карабоўшчыны добра ведаюць нашага госця як адказнага кіраўніка, але мала хто ведае пра яго захапленне – пляценне вырабаў з лазы. Наш госць – старшыня Карабоўскага сельскага выканаўчага камітэта Татун Яўгеній Клаўдзіевіч.

         Не так проста кіраўніку адшукаць час у сваім шчыльным рабочым графіку, аднак на наша запрашэнне Яўгеній Клаўдзіевіч з задавальненнем адгукнуўся.

         Дзеці былі шчаслівыя. Сустрэчу з нецярплівасцю чакалі і хлопчыкі, і дзяўчынкі. Мы распачалі падрыхтоўку, бо пачаткоўцы хацелі прайсці “школу лозапляцення” з самага пачатку. Яўгеній Клаўдзіевіч падтрымаў маленькіх майстроў і навучыў, як правільна нарыхтаваць лазовыя пруцікі.

         У першыя майскія дні адбылася сустрэча. Трэба было бачыць, як зразумела і цярпліва Яўгеній Клаўдзіевіч дзяліўся з вучнямі сакрэтамі пляцення з лазы. Ён пазнаёміў дзяцей з інструментамі, відамі лазы, прыёмамі лозапляцення. Хлопчыкі і дзяўчынкі дружна ўключыліся ў працу. Пад кіраўніцтвам майстра яны навучыліся плесці лазовы плот, аснову для кошыка, якая ператварылася ў чароўную лазовую кветку. На вачах маленькіх майстроў стварыўся “лазовы цуд”.

         Дзеці наперабой дзяліліся з госцем сваімі ўражаннямі ад працы, а Яўгеній Клаўдзіевіч сціпла прымаў падзякі.

         У канцы сустрэчы хлопчыкі і дзяўчынкі частавалі госця духмянай гарбатай, задавалі пытанні, запрашалі прыйсці яшчэ. На радасць дзецям Яўгеній Клаўдзіевіч не адмовіўся ад запрашэння.

         Госць пайшоў, а дзеці доўга гаманілі і планавалі новую сустрэчу.