Вось ужо трэці год наша ўстанова адукацыі носіць імя воіна-інтэрнацыяналіста Рамана Іосіфавіча Мацеюна. З гэтай нагоды і завіталі да нас шаноўныя госці – члены абласной арганізацыі рэспубліканскага грамадскага аб’яднання “Беларускі саюз ветэранаў вайны ў Афганістане”.

Кіраўнік арганізацыі – Валяр’ян Альбінавіч Мацкевіч – выказаў падзяку кіраўніцтву раёна, адміністрацыі і вучням школы за тое, што ў нашай установе адукацыі захоўваецца памяць аб воінах, якія выконвалі інтэрнацыянальны абавязак у Рэспубліцы Афганістан.

У ходзе сустрэчы вучні расказалі пра гісторыю Карабоўскай школы, пра першага дырэктара – Ляхава Івана Сцяпанавіча, у гонар якога адкрыта памятная дошка ў фае школы, пра выдатных настаўнікаў і выпускнікоў.

Госці наведалі музейную экспазіцыю, прысвечаную Афганскай вайне. Памяці Рамана Іосіфавіча Мацеюна адводзіцца галоўнае месца ў нашай экспазіцыі.

Значнасць ратнага подзвігу салдат і афіцэраў не падвяргаецца сумненню. Афганістан - наш боль і памяць пра тых, хто вышэй за жыццё цаніў свой інтэрнацыянальны абавязак і воінскі гонар, праявіў у баях адвагу і доблесць. Будзем жа памятаць загінуўшых і паважаць тых,  хто застаўся ў жывых.

 Як вядома, войны не заканчваюцца тым момантам, калі змаўкае зброя. Яны працягваюцца ў душах тых, хто ў іх удзельнічаў. І вайна на афганскай зямлі - не выключэнне. Яна доўга яшчэ будзе нагадваць пра сябе, працягваючы жыць у кнігах, якія распавядаюць аб трагізме вайны і мужнасці простых салдат ...

Намеснік дырэктара па асноўнай дзейнасці                     А.П. Жыдко