У школе прайшла фальклорная гадзіна «Вялікдзень: вытокі і традыцыі», на якую завіталі вучні 1 класа. Бібліятэкар расказала дзецям пра гісторыю свята, яго сімвалы і звычаі. Першакласнікі даведаліся, чаму на Вялікдзень фарбуюць яйкі, пякуць кулічы і асвячаюць велікодны кошык. З цікавасцю дзеці паглядзелі “Мультик от Капельки “Что такое Пасха?» , а таксама паслухалі пра тое, як нашы продкі сустракалі гэты светлы дзень.
     Але самае вясёлае чакала наперадзе – велікодныя гульні! Маленькія вучні з задавальненнем качалі яйкі з лубка: чыё яйка дакоціцца далей, той і перамог. А яшчэ большая радасць была, калі ўдавалася выбіць чужое яйка і тады яго забіраў пераможца. Потым адбыліся сапраўдныя «біткі» – дзеці з азартам стукаліся яйкамі, спрабуючы знайсці самае моцнае.
    Напрыканцы мерапрыемства першакласнікі пачаставаліся Велікоднай булкай і салодкім чаем. Фальклорная гадзіна прайшла ў цёплай, радаснай атмасферы. Дзеці не толькі пашырылі веды пра беларускія традыцыі, але і адчулі сапраўдны дух Вялікадня. Такія сустрэчы дапамагаюць выхоўваць павагу да народнай культуры з самага маленства.